Rev 11 | BOJ | STEP | Onaqa Qotei na walwelqa toqoŋ bei ebsiqa merbej, “Ni toqoŋ endi waiysim ijo atra tal aqa ole keret. Osim atra bijal aqa ole dego keret. Tamo uŋgasari ijo atra tal miligiq dia e qa loueqnub qaji naŋgi dego sisiy.

Revelation of John 11

Tamo aiyel naŋgi Qotei aqa anjam palontoqnej

1 Onaqa Qotei na walwelqa toqoŋ bei ebsiqa merbej, “Ni toqoŋ endi waiysim ijo atra tal aqa ole keret. Osim atra bijal aqa ole dego keret. Tamo uŋgasari ijo atra tal miligiq dia e qa loueqnub qaji naŋgi dego sisiy. 2 Ariya koro sawa atra tal meq di unu qaji di keretaim. Di urat. E na koro sawa di sawa bei bei qaji tamo naŋgi enjritqa naŋgi na ijo qure koba Jerusalem niñaqyoqnibqa bai 42 gilqas. 3 Bati deqa e na ijo anjam palonto tamo aiyel qariŋnjritqa naŋgi are ugeo qaji gara jigsib ijo anjam palontoqnibqa bati 1,260 gilqas.”

4 Tamo aiyel di kaŋar qeli bul. Naŋgi aiyel lam bul dego. Naŋgi Tamo Koba Qotei sawa sawa kalil taqatejunu qaji aqa ulatamuq dia tigelejunub. 5 Tamo qudei naŋgi na naŋgi aiyel ugeugeinjrqa maroqnibqa naŋgo aiyel medabuq na ŋamyuo brantosim naŋgo jeu tamo naŋgi di koitnjrim yuekritsib moreŋqab. Deqa tamo bei na naŋgi aiyel ugeugeinjrqa marimqa kumbra dena qujai a segi moiqas. 6 Qotei na naŋgi aiyel siŋgila enjrimqa naŋgo anjam maro bati qa naŋgi laŋ getentibqa awa bqasai. Qotei na olo naŋgi aiyel siŋgila enjrimqa naŋgi maribqa ya kalil leŋ bulyqas. Kumbra uge uge deqaji naŋgi aiyel na tamo uŋgasari enjroqnibqa naŋgi niñaqoqnqab. Naŋgi aiyel naŋgo segi areqalo na kumbra di yoqnqab.

7 Naŋgo aiyel anjam maro bati koboamqa wagme juwaŋ sub guma kobaq di unu qaji a subq dena brantosim naŋgi aiyel qoto itnjrsim a qoto siŋgilaosim naŋgi ñumim moreŋqab. 8 Moreŋabqa naŋgo aiyel jejamu qure aqa gam koba ambleq di uratnjrib sqab. Qure di aqa ñam iga sasirosim mareqnum, “Sodom ti Isip ti.” Qure dia nami naŋgo Tamo Koba ŋamburbasq di qamnab moiej. 9 Naŋgo aiyel jejamu gam ambleq di soqnibqa tamo uŋgasari jejamu segi segi qaji, sawa segi segi qaji, anjam maro segi segi qaji, leŋ segi segi qaji kalil naŋgi beleŋosib naŋgo aiyel jejamu koqnjroqnibqa bati qalub bei oto gilqas. Naŋgo aiyel jejamu subq atqa saidoqnqab. 10 Naŋgi aiyel moreŋonub deqa tamo uŋgasari kalil mandamq di unub qaji naŋgi tulaŋ arebole-boleinjroqnimqa iŋgi uyoqnsib lou tuoqnib naŋgo was naŋgi korooqnib lueinjroqnqab. Naŋgi kumbra degyoqnqab. Di kiyaqa? Qotei aqa medabu o qaji tamo aiyel dena tamo uŋgasari kalil mandamq di so qaji naŋgi jaqatiŋ koba enjroqneb deqa.

11 Bati qalub bei oto di koboonaqa Qotei na jagwa qariŋyonaqa naŋgo aiyel miligiq aiej. Ainaqa naŋgi aiyel olo mondor osib ŋambile sosib tigeleb. Tigelonabqa tamo uŋgasari naŋgi na naŋgi aiyel unjrsib tulaŋ ulaugeteb. 12 Onaqa laŋ goge dena laŋ aŋgro bei a tulaŋ koba leleŋosiqa naŋgi aiyel metnjrej, “Niŋgi goge endeq boiye.” Onaqa naŋgi aiyel aqa kakoro qusibqa laŋbi miligiq na laŋ qureq oqeqnabqa naŋgo jeu tamo naŋgi na naŋgi koqnjresoqneb. 13 Onaqa bati qujai deqa mimiŋ tulaŋ kobaquja dosiq qure koba di reŋgiŋyonaqa qure taqal qujai bei padalej. Qure taqal 9-pela soqneb. Mimiŋ dena tamo uŋgasari 7,000 padaltnjrej. Onaqa tamo uŋgasari mimiŋ dena padaltnjrosai qaji naŋgi tulaŋ ulaugetosib Qotei laŋ qureq di unu qaji aqa ñam soqteb.

14 Ariya gulube kobaquja namba 2 agi koboqo. Niŋgi quiye. Sokiñalaysimqa olo gulube kobaquja namba 3 brantqas.

Laŋ aŋgro namba 7 na aqa gul anjamej

15 Ariya laŋ aŋgro namba 7 na aqa gul anjamonaqa tamo uŋgasari kalil laŋ qureq di unub qaji naŋgi tulaŋ koba leleŋosib endegsib marnab quem, “Gago Tamo Koba Qotei naŋgi aqa Ŋiri Kristus wo Mandor Kokba sqajqa bati agi brantqo. Deqa naŋgi aiyel bati gaigai Mandor Kokba sosib sawa sawa kalil taqatnjroqnqab.” 16 Onaqa gate kokba 24 Qotei aqa ŋamgalaq dia naŋgo awo jaramqsi awesoqneb qaji naŋgi siŋga pulutosib ŋam quosib Qotei louetoqneb. 17 Osib endegsib pailyoqneb,

“O Tamo Koba, ni segi qujai Qotei bole.
Ni siŋgila koba. Siŋgila kalil inoq di unu. Ni bini unum. Ni nami soqnem.
Ni na ino siŋgila osim agi ni Mandor Kobaonum.
Deqa iga ni biŋimeqnum.
18 Sawa bei bei qaji tamo naŋgi tulaŋ minjiŋ oqetnjreqnu.
Ariya ni dego ino minjiŋ oqwajqa bati brantqo.
Ni na tamo moreŋo qaji naŋgo une qa naŋgi peginjrsim ñumeleŋqajqa bati agi brantqo.
Ino wau tamo kalil ni na awai bole enjrqajqa bati dego brantqo.
Ino wau tamo naŋgi di agi ino medabu o qaji tamo ti, ino segi tamo uŋgasari tiŋtiŋ naŋgi ti, tamo kalil ni qa ulaoqnsibqa ino sorgomq di geregere unub qaji naŋgi ti.
Ino wau tamo naŋgi di agi tamo ñam kokba ejunub qaji naŋgi ti tamo ñam saiqoji unub qaji naŋgi ti. Ni na naŋgi awai bole enjrqajqa bati agi brantqo.
Ariya tamo naŋgi mandamq endia tamo uŋgasari naŋgi ugeugeinjreqnub qaji naŋgi ni na kamba ugeugeinjrqa bati agi brantqo.”
19 Gate kokba 24 naŋgi degsib Qotei qa loueqnabqa laŋ aŋgro naŋgi na Qotei aqa atra tal laŋ qureq di unu qaji aqa siraŋ waqtosibqa Qotei aqa dal anjam so qaji ŋam moŋgum tal miligiq di sonaq uneb. Onaqa minjal ti qatroŋ ti kola anjam ti mimiŋ ti ais oŋgol kokba awa bul ti aieleŋeb.